មេរៀន: បួសស៊ូណិត
(ការបួសដោយស្ម័គ្រចិត្ត)
អល់ឡោះជាម្ចាស់ទ្រង់បានដាក់កាតព្វកិច្ចឱ្យបួសតែមួយខែរ៉ម៉ាឌនប៉ុណ្ណោះក្នុងមួយឆ្នាំ។ ប៉ុន្តែទ្រង់ក៏បានជំរុញ និងបើកឱកាសឱ្យយើងបួសនៅថ្ងៃផ្សេងៗទៀត ដើម្បីប្រមូលផលបុណ្យបន្ថែម និងទទួលបាននូវក្តីមេត្តាករុណាពីទ្រង់។
នៅក្នុងមេរៀននេះ អ្នកនឹងបានស្វែងយល់អំពី៖
- ប្រភេទនៃការបួសស៊ូណិត (ស្ម័គ្រចិត្ត) មួយចំនួន
- ឧត្តមភាព និងផលបុណ្យដ៏ធំធេងនៃការបួសទាំងនោះ
១. ការបួសថ្ងៃអាស៊្ហូរ៉ា
គឺជាថ្ងៃទី១០ នៃខែមូហារ៉ម (ខែទីមួយនៃប្រតិទិនឥស្លាម)។ ថ្ងៃនេះគឺជាថ្ងៃដែលអល់ឡោះបានសង្គ្រោះព្យាការីមូសាឱ្យរួចផុតពីស្តេចហ្វៀរអោន (ផារ៉ាអុង)។ ការបួសថ្ងៃនេះជាការថ្លែងអំណរគុណចំពោះអល់ឡោះ និងជាការអនុវត្តតាមព្យាការីមូហាំម៉ាត់ ﷺ។
"ការបួសថ្ងៃអាស៊្ហូរ៉ា គឺវាលុបលាងនូវបាបកម្មក្នុងឆ្នាំកន្លងផុតទៅ។"
ចំណាំ៖ គេពេញចិត្តឱ្យបួសមួយថ្ងៃមុន (ថ្ងៃទី៩) ភ្ជាប់ជាមួយថ្ងៃអាស៊្ហូរ៉ា (ថ្ងៃទី១០) ផងដែរ។
២. ការបួសថ្ងៃអារ៉ហ្វះ
គឺជាថ្ងៃទី៩ នៃខែហ្ស៊ុលហ៊ិជ្ជះ (ខែទី១២) ដែលជាថ្ងៃអ្នកធ្វើហាជ្ជីប្រមូលផ្តុំគ្នានៅវាលអារ៉ហ្វះ។ សម្រាប់អ្នកដែលមិនបានទៅធ្វើហាជ្ជី ការបួសនៅថ្ងៃនេះមានឧត្តមភាពខ្ពស់បំផុត។
"ការបួសថ្ងៃអារ៉ហ្វះ គឺវាលុបលាងនូវបាបកម្មក្នុងឆ្នាំដែលកន្លងផុតទៅ និងឆ្នាំដែលនឹងមកដល់។"
៣. បួស៦ថ្ងៃ ក្នុងខែស្ហាវវ៉ាល
ខែស្ហាវវ៉ាលគឺជាខែបន្ទាប់ពីខែរ៉ម៉ាឌន (ខែទី១០)។ ការបួស៦ថ្ងៃបន្ថែមក្នុងខែនេះ ក្រោយពីបានបួសខែរ៉ម៉ាឌនរួចរាល់ នឹងទទួលបានផលបុណ្យដ៏មហាសាល។
"ជនណាបួសខែរ៉ម៉ាឌន បន្ទាប់មកគេបួស៦ថ្ងៃទៀតនៃខែស្ហាវវ៉ាល ប្រៀបដូចជាគេបួសមួយឆ្នាំពេញ។"
៤. បួស៣ថ្ងៃ រៀងរាល់ខែ
គឺជាការផ្ដែផ្ដាំដ៏សំខាន់មួយរបស់ព្យាការីមូហាំម៉ាត់ ﷺ ទៅកាន់ដៃគូរបស់លោក។ ការបួសនេះអាចធ្វើនៅថ្ងៃណាក៏បានក្នុងខែនីមួយៗ។
"...សំណព្វចិត្តរបស់ខ្ញុំ (ព្យាការី) បានផ្ដែផ្ដាំខ្ញុំនូវ៣ចំណុច... គឺបួស៣ថ្ងៃរៀងរាល់ខែ, សឡាតហ្ទូហា និងសឡាតវីតៀរមុនចូលគេង។"